رقيمي

الخصوصية

TAJ Signature — سجل تجاري 7053046830 .
للتواصل: info@tajsignature.sa

الصفحة دي مكتوبة عشان نظام حماية البيانات الشخصية السعودي، وبلغة تقدر تقراها. نجمع أقل شي ممكن، ونقول لك بالضبط وين يروح.

إيش نجمع، وليش

رقم جوالك — هو حسابك، وعليه يوصل كود الدخول. بدونه ما فيه حساب.
بيانات منشأتك اللي تكتبها بنفسك: الاسم، الشعار، العنوان، الرقم الضريبي. نحفظها عشان نعبّيها لك تلقائياً المرة الجاية، ونطبعها على مستنداتك.
محتوى مستنداتك — عشان نجهّز الملف ونعرضه لك بعدين.
إيميلك — اختياري. لو أضفته نرسل لك المستند عليه، وتقدر تشيله من صفحة «مستنداتي» في أي وقت.
بصمة الجهاز — رقم مشفّر باتجاه واحد. عدّاد للنسخ المجانية، مو هوية: ما نقدر نرجّعه لشخص.

ما نبيع بياناتك، وما نشاركها مع معلنين، وما نستخدم محتوى مستنداتك لأي غرض غير تجهيزها لك.

مين يشوف بياناتك غيرنا

دول مزوّدو الخدمة اللي نشتغل معهم فعلياً. القائمة مولّدة من إعدادات النظام نفسه، مو مكتوبة بالإيد — يعني لو غيّرنا مزوّد، الصفحة تتغير معه.

المزوّد	الدور	الموقع	الاطلاع
Supabase	قاعدة البيانات — الحساب والمستندات	ألمانيا (فرانكفورت)	رقم الجوال، الإيميل لو أضفته، بيانات منشأتك، ومحتوى مستنداتك
Fly.io	تشغيل التطبيق وتجهيز ملفات PDF	ألمانيا (فرانكفورت)	كل ما سبق، أثناء المعالجة
Supabase Storage	تخزين الشعارات وملفات PDF	ألمانيا (فرانكفورت)	الشعار والملفات النهائية
Akedly	إرسال كود الدخول على واتساب أو رسالة	مصر	رقم جوالك فقط — ولا شيء عن مستنداتك
Moyasar	بوابة الدفع	السعودية	بيانات بطاقتك تروح لهم مباشرة وما تمر علينا أبداً

نقل البيانات خارج المملكة

نقولها صريحة: خوادمنا خارج المملكة — ألمانيا (فرانكفورت). ما فيه مزوّد سحابي من اللي نستخدمهم عنده مركز بيانات داخل السعودية، فالنقل هنا ضرورة تقنية مو اختيار. النظام ما يمنع النقل، لكنه يوجب إننا نخبرك فيه — وهذي هي. استخدامك للخدمة موافقة على هذا النقل، ولو ما ناسبك تقدر تحذف حسابك في أي وقت. بيانات الدفع استثناء: تعالجها بوابة مرخّصة من ساما داخل السعودية، وما تمر علينا.

كم نحتفظ فيها

رابط تحميل المستند	٣٠ يوم من إصداره
مستنداتك وبيانات منشأتك	لين تحذف حسابك بنفسك من صفحة «مستنداتي»
سجلات الدفع	خمس سنوات — مطلوبة نظاماً للسجلات المحاسبية والضريبية

رابط تحميل المستند صالح ٣٠ يوم، وأي شخص معه الرابط يقدر يفتح الملف — فتعامل معه زي ما تتعامل مع الملف نفسه.

حقوقك

تعرف إيش عندنا عنك	كل اللي عندنا معروض لك في صفحة «مستنداتي»
تصحّح بياناتك	من أول خطوة في أي نموذج، أو من صفحة «مستنداتي»
تحذف بياناتك	زر «احذف حسابي» في صفحة «مستنداتي» — فوري وما يحتاج تراسلنا
تسحب موافقتك	حذف الحساب هو سحب الموافقة
تشتكي	لهيئة البيانات والذكاء الاصطناعي (سدايا) لو ما رضيت عن ردنا

الحذف فوري وبيدك. زر «احذف حسابي» في صفحة مستنداتي يمسح حسابك وكل مستنداتك وملفاتك المخزّنة على طول. ما تحتاج تراسلنا وما فيه مدة انتظار. الشي الوحيد اللي يبقى هو سجلات الدفع، لأن الاحتفاظ فيها مطلوب نظاماً.

ابدأ مستندك